బిగ్ బాస్ సీజన్-8 ముగియడానికి మరో రెండు రోజులు మాత్రమే మిగిలి ఉంది. ఇక టాప్-5 ఫైనలిస్ట్ ల జర్నీ వీడియోలని చూపించేశాడు బిగ్ బాస్. మొదటగా గౌతమ్, ఆ తర్వాత అవినాష్ జర్నీ వీడియో చూపించిన బిగ్ బాస్ నిన్నటి ఎపిసోడ్ లో మొదటగా నిఖిల్ జర్నీ వీడియో చూపించారు. 

నిఖిల్.. నది పుట్టుక ఒక్కో బొట్టుగా నెమ్మదిగానే మొదలవుతుంది.. కానీ ప్రయాణంతో ప్రవాహం పెరిగి మహానదిగా మారుతుంది.. మీ ఆట తీరు కూడా అదే విధంగా ప్రతిబింబించింది.నిందలు మీ మీద ఎన్ని వేసినా ఏగాగ్రతను కోల్పోలోదు.. అసలైన ఆటగాడికి ఉండాల్సిన ముఖ్య లక్షణం అదే.. మిగతా బంధాలు మీతో చివరి వరకూ కలిసి నడవకపోయినా ఈ ఇంట్లో పృథ్వీ మీకు దొరికిన అసలైన సోదరుడు.. మీ ఇద్దరూ ఒకరితో ఒకరు.. ఒకరి కోసం ఒకరు నిలబడ్డారు.. ప్రత్యర్థులతో తలపడ్డారు. గ్రూప్ గేమ్ అని మీ ఆటని వేలెత్తి చూపినప్పుడు మీ మనసు అందుకు ఒప్పుకోలేదు.. ఎందుకంటే మీరు మీ స్నేహం కోసం ఆడారు.. కానీ మీ ఆట పూర్తిగా మీ వ్యక్తిగతం. మీరు నమ్మిన స్నేహితులందరూ మీ నమ్మకాన్ని నిలబెట్టుకోలేదు.. అప్పుడు మీ మనసుకి అయిన గాయాన్ని మీలోనే దాచుకున్నారు .. మిమ్మల్ని చాలా మంది సేఫ్ గేమర్ అని నిందించారు.. కానీ మీరు స్నేహాన్ని పట్టుకున్నంత బలంగా శత్రుత్వాన్ని పట్టుకోరన్న విషయాన్ని వాళ్లు గ్రహించలేకపోయారు.

నిజానికి మీరొక స్మార్ట్ గేమర్.. ఎందుకంటే మీ సహనాన్ని పరీక్షించినప్పుడు కామ్‌గా ఉన్నారు.. మీ సత్తాని పరీక్షించే టాస్కుల్లో రక్తాన్ని సైతం చిందించి మీ దూకుడు చూపించారు.. మీ మీద ఎవరు ఎప్పుడు దుమ్మెత్తి పోసినా ఎప్పుడు జెంటిల్‌గా ఉండాలో ఎప్పుడు మ్యాన్లీగా మారాలో తెలిసిన నిజమైన జెంటిల్ మ్యాన్ మీరు.. రాయల్స్ ఇంట్లోకి ఎంటరైనప్పుడు విచ్ఛిన్నమైన ఓజీలని ఒకతాటిపైకి తీసుకొచ్చారు..మీ కన్నా ఇంటి కోసమే ఎక్కువ ఆలోచించారు.. సరదాకి మీరు ఏం చేసినా హద్దులు దాటలేదు.. ఈ లక్షణాలే మిమ్మల్ని చివరి మజిలీకి అతి చేరువలో నిలిపింది.. నిఖిల్.. ఒక పోటీదారుడిగా.. ఒక ఇంటిసభ్యుడిగా మీ ప్రయాణం మీకు సంతృప్తినిచ్చినా.. మీ మనసులోని ఆ ఒక్క లోటూ బిగ్‌బాస్‌కి తెలుసు.. మీ మనసు మోస్తున్న ఆ బరువు తొందరగా తగ్గాలని.. మీ మనసుకి దగ్గరైన ప్రతిదీ మీకు దక్కాలని కోరుకుంటూ ఈ ఇంట్లో మీ ప్రయాణాన్ని ఒకసారి చూద్దామంటూ నిఖిల్ జర్నీ వీడియోని ప్లే చేశాడు బిగ్ బాస్. ఇక తన జర్నీ వీడియో చూసి ఎమోషనల్ అయ్యాడు నిఖిల్.